الشاعر عبدالهادي بن سهل المري

الشاعر عبدالهادي بن سهل المري

 الشاعر عبدالهادي بن سهل المري 

رفض الانتقال والعيش مع ابنائه في قطر بالرغم من محاولاتهم معه وايضا رفض الانتقال مع اخوانه للعيش في الكويت.

نزل الشاعر عبدالهادي بن سهل  عند رغبه ابنه الدكتور جابر للذهاب الى قطر لعمل بعض الفحوصات الطبيه وما دار يومين حتى عزم على الرجوع مع ابن علي الى السعوديه وعند عبوره بمنفذ سلوى الحدودي هاضت قريحه الشاعر بهذه القصيده 

من أشجى قصائد الحنين للديار

يقال أنه كان في مهمة تحصيل الزكاة من قبائل شمال السعودية لصالح حكومة الملك عبدالعزيز. ويبدو أن المدة طالت ولم يأت بديله كما كان متوقعا، فغلبه الاشتياق إلى أهله وديار آل مرة جنوب منطقة الأحساء.

فقال:

طالت الشِطّة علينا، ولا جانا بدل 

       كل ما زل الشهر واعدو باللي وراه

حي اهل عدٍ جنوبٍ على جاله عبل

         طيّبٍ للبل وراعيه ما يقطع ضمآه

 ليت مَن يركب على الهجن وتخلّا قَُبل

         تحت نجم سهيل قد له على المسرى جراه

صاحبي في غيبتي ما لبس كود السمل

         والجديد مهملٍ لين يدرس في طواه

ونّتي ونّة خلوجٍ ولدها ما جدل

            تبدي المشراف وترد منه للوطاه

لديه العديد من القصائد وهذا ما استطعت جمعه :

يا مال قلب يمتحني بتفكير:

يا مال قلب يمتحني بتفكير
      يدرس تجاريب الدهر كل عامي

والي تذكرت الرجال المناعير
     رفقة هل الطولات مبلغ مرامي

والى تهيا لي من الله تيسير
     سيرت للي يستحق السلامي

نصيت( زايد)زاده الله بالخير
     شيخ على كسب النفايل يحامي

شيخ وعنده للرجاجيل تقدير
     وله عندهم تحية وحترامي

غيث على شعبه وامير على أمير
     نور لشعبه مثل بدر التمامي

فلاح ما هو يهيب المخاسير
     عز الرجال وزاد حق اليتامي

الطيب له نور ودلائل وتدبير
     صبحا الى من بان يجلي الظلامي

ونعم بزايد يوم ردت الاخابير
     تبنى له البيضاء بروس الزوامي

تنشر على روس الجبال المزابير
     وتمشي بها الطرشان شرقا وشامي

شيخ به العاصي يدل المعايير
     ويضحك حجاجه للضعيف الكهامي

عند اللوازم ما يواعد بتاخير
     له في جميع الطائلات اهتمامي

الى اصبحت حيل الليالي معاشير
     فيها صعوبات تهز العضامي

(زايد)بدوره مثل ابوزيد والزير
     يفدي بروح في الرخى ما يسامي

يرخص اذا صكت عليه الطوابير
     يوم به الفرسان تنثر لدامي

فلاحي من لابته تقصر السير
     على العدو لاجا نهار الزحامي

له دولة في وردهم يشبع الطير
     صطوات تخلف ظنون الغشامي

(وزايد) يجازي راعي الخير
     والشر يجزاه الخسائر جسامي

بالخير لاجاء نهار فيه مثل المعاصير
     يضيع اسامي فيه ويبين اسامي

يوم مخاييله مطرها مسامير
     تنسف على روس النوايف عسامي

صلاة ربي عد نبت النواوير
     على رسول الله صدوق الكلامي

يالله من قلب ٍ عرفت اختياره:

يالله من قلب ٍ عرفت اختياره
     وده مع البل مارقات النسانيس
الى تذكرت الرخا والحضاره
     طرى على شوف البكار المعابيس
لاحد يقول ان مشترى البل خساره
     البل ذهب ويساق فيها قراطيس
كم شيخ قوم ٍ تجذب البدو ناره
     من دونها حامت عليه القرانيس
والبل مع الناموس فيها تجاره
     وزود ٍ لقوة كاسبين النواميس
الطيبين اهل الوفا والنماره
     زادو لها الاثمان وارخو لها الكيس
لا باس في الراحه وزين العماره
     لاشك راعيها بقلبه هواجيس
مهونة ٍ له لا شكى حيف جاره
     يصبح من الضيقه بقلبه حواسيس
والبل توسع له منازل دياره
     وتبعد همومه مبعدات المراويس
لاشد راعيها عليها قشاره
     تقطع به الفرجه بليا منافيس
ياخذبها في كل بر ٍ سفاره
     يمشي بها في قافر ٍ مابعد ديس
عقب الحيا التالي تجدد خضاره
     مافيه قبله كون جرة عواسيس
والناس كل ٍ عند ربه وقاره
     ناس ٍ على خير ٍ وناس ٍ مفاليس
واستغفر الله عد هاتف امطاره
     واستغفر الله واستعيذه من ابليس

اللي على الأدنين فتق وخله:

اللي على الأدنين فتق وخله
     بوصفه لك وصف وانت مخدومي
خطوى صبي ما قريبه يمله
     اسنافي(ن) جنسه قليل معدومي
يفرح الى جاو النشاما محله
     يتعب لما جوه الرجال القرومي
يحرص على جاره يدور ارضله
     يرخص له المطلوب لاجا اللزومي
وان جات عقب السير مثل الأهله
     يذبح من الحيل المواحيل كومي
وإلا شجاع ما اللوازم تزله
     يوم المكارم مثل ضلع زحومي
من دون حقه ياخذ السيف سله
     يعرف قوانين الوفاء والسلومي
تنطح به العيال ويزين دله
     لا ولدت عوج السوالف بتومي
ويقلط إلى غليت عمار المذله
     كنه على النفس الكريمه يسومي
والكايد اللي كل حمل يشله
     من لابته ينقل كثير الهمومي
يرقد رفيقه خابره ساهرله
     من طيب راسه ساهر(ن) ما ينومي
يضحك الى جا من خصيمه اشكله
     ياخذ حقوقه بالوفا والتمومي
ياخذ ويعطي كل عقد(ن) يحله
     عنده دوا الجربا وكل مهيومي
من طيب ساسه طيب راسه جبله
     ماهو على ربعه لنفسه يزومي
وماله الى حفت لياليه فله
     كن العرب عنده سبائل اطعومي
وباقي العرب يافالح الراي خله
     من جيز مخلوقات منشي الغيومي
والناس محد(ن) راح بالطيب كله
     قد قسمه ربي عليهم اقسومي
وكل عطاه الله دليل يدله
     مثل الغنايم كاسب ومحرومي

كفخ قلبي:

كفخ قلبي كفخ طيرٍ كفخ بالمنقله
     من حرار الشام فرخٍ عزيزٍ ومحشوم
تل سبقه من جريره وزاع وهملّه
     والعهد به يوم شافوه بسبوقه يحوم
صاحبي لو هو بعيدٍ لزومٍ أصله
     والله إنّ جيّ الحبيّب عليّ أكبر لزوم
راكب اللي لاشعفه الغنا هج أقبلّه
     أشقرٍ يبري من الصدر غلقات الهموم
فوقه الليّ مابعيد المثايل يجهله
     إنّ بغى المنهاج ماغضّت عيونه بنوم
صوب من هو حط فالقلب نارٍ وأشعله
     وأخلفه من ملّت الناس وأدعاه مغروم
كامل الشارات سبحان ربٍ فصلّه
     بو نهيدٍ توّ ماشبتّه فيه الهدوم
باأشهد أنّه حظ من كان حظّه حصلّه
     النصيب يصيب والناس معطى ومحروم
طال صبري وأترجّى الليال المقبله
     مثل من يرجي ثواب الصيام اللي يصوم
جعل عدٍ شدّ صافي الجبين وهملّه
     ياخذ سنينٍ وجاله من الغيث محروم

يا مال قلب تختلف فيه الاشوار:

يا مال قلب تختلف فيه الاشوار
     الله كريم وطيب فيه ظني
وين العرب راحوا طريين الاشوار
     اربهم ما كفو الرجل عني
يا من يعلمني من البدو باخبار
     يخبرهم ان قلبي عليهم يوني
مثل الخلوج اللي ولدها له اضوار
     تسهر تدور له وهو ما يحني
من دون ربعي للونيتات مشوار
     ليل ونهار والمكاين ترني
وقلبي يمنيني مع البدو مصفار
     في مرتع ما هو يجي بالتمني
مرية يرعون حسكات الابوار
     في كل قفر ترتعه بالتهني
يا زين شدتهم على ذكر الامطار
     غيث به القلب الشقي يرجهني
من غاب حطوا له على الدار توثار
     ما يحترونه وان بغى ما يثني
ما همهم لو كان يمسي على الدار
     يصبح لاثرهم والسفر مستظني
شدوا مع طلعاتها كل مشكار
     يبرى لها اللي ما قعوده يوني
يا زين شدتهم على ذكر نوار
     ما قبلهم كون القبيسه تغني
يا حلو منزلهم عذبات الاقفار
     او لا اقبلوا واولا سلفهم يبني
كل يبغي يسبق على شبة النار
     سبق عليها من الاجاويد فني
تمايلوا صوبه هل المجد والكار
     نجره لعطران الشوارب يدني
توخروا اللي عاد حيرانه صغار
     وحيل العشاير والبكار اقبلني

قال الشبيبي والذي هاض مابه:

قال الشبيبي والذي هاض مابه
     مثايل ما هي على الله خفيه
يا مال قلب هيضه وانتحابه
     ثورة هواجيس علي انكريه
واللي بعث هاجوس قلبي وجابه
     بعث النسم للنمله الفارسيه
مبادي في عالي نوايف هضابه
     وعيني على شوف الرفاقه شقيه
من دونهم بعد تقطع سرابه
     ما ياصله راعي الذلول الونيه
الله على الميلاف ماقل ادابه
     اذا تذكر ديرته والنحيه
قلبي غدا بين الطواري انهابه
     جزور قوم بين ناجح ونيه
بغيت من لعب الروادو طرابه
     وعيا طربها يدخل العاقليه
لو كان ابو محمود راعي الربابه
     ياماخذ علمي على ظاهريه
والنفس ما تطرب بشئ مالها به
     وعندي سميره ما لها قابليه
والخط عندي مثل كسب الكسابه
     اللي لفاني بالعلوم الطريه
يعيش نشمي بدا بالنجابه
     طرش لي المكتوب حب وحميه
صالح نظر عيني لفاني كتابه
     عنوان خطه لي سلام عليه
يا مرحبا باللي يطرش اخطابه
     ترحيبة مثنية بالتحيه
فزيت له فزت وحيد الذيابه
     يستانس الذيب الوحيد الخويه
امست قلبي سايلات شعابه
     واصبح غصونه عقب الاصرام حيه
يا ابو حمد كتب الورق رفع بابه
     تجديد عهد للقلوب الشقيه
برد على قلبي كثير التهابه
     سلامكم يا طيين العنيه
سلام ربع ينزعون الطلابه
     وقلوبهم على الخساير قويه
ربع بهيبتهم يجي له مهابه
     وانا وبلياهم عزومي رديه
بالوجه جاهياتهم لي جلابه
     وبالفعل دوني ينطحون القضيه
يمشون للطيب على ماهقا به
     عيين اعراف شيمهم قويه
اذا تذكر كل حي احبابه
     طروا علينا كل صبح وعشيه
لا بد من بعد المراح انقلابه
     ما غير جمعاهم حياة شليه
يا هيه يا راعي يريد مشابه
     روح مكاتيبي سلام ووصيه
من واحد يبدي سراير خطابه
     وخطر عليه يدنها هاشميه

بالضحى شرفت عالي طويل ارجادها:

بالضحى شرفت عالي طويل ارجادها
     هاضني مشراف( ابو ميركه) رجم طويل
ابدع القيفان واحب نظم اجدادها
     من هواجيس تخالف ولامنها ذبيل
فوح صدري فوح شامية بقنادها
     سج منها اللي ركاها على الجمر الصقيل
يااللي تنشد غاية القلب ويش مرادها
     ما ابغى الا طاعة الله معدل كل ميل
يا الله ياموصل الايام حسب عدادها
     يالع ليم بالاجل والغيب والمد الجزيل
يا معيش النفس غصبا على حسادها
     طالبك طاعتك فان طاعتك خير فضيل
ترجم الشيطان لان بغى كوادها
     و عز اهل الاسلام يوم انك الهادي الدليل
وعمر الدنيا بدين يعز اجوادها
     واقه ر العدوان ياللي على النفس وكيل
اطلبك نفسي لطاعتك واستجهادها
     وحط لي قلب يحبك وهو منك ذليل
والجماله جعل ماني من جحادها
     واس تجيرك من جواب يجي ما له دليل
ضايع الهرجه ترى الفايده ما فادها
     ورفقة الرديان لها طعم لحم الهذيل
اطلب الله هابل غايتي سيهادها
     تجني بالفعل وخيالها زين جميل
اركب اللي ما تصعب على قوادها
     خارع كنها غزال يراوزله مقيل
او هنوف في ليالي تفض حدادها
     طربة واللي خسرها حنجها به قليل
حايل عرماس ما كثروا لدادها
     زادها المرباع من غير قدميها الحويل
عرضها طول حقرها بها استيعادها
     مدبحة مربوعة الراس والعلبى طويل
والمخاصر نابيات وفج عضادها
     والخفاف صغار وتصوغ ثرها بالهذيل
كن تصيغاها على الارض واستركادها
     نمشة يلعب بها جاهل تو الخليل
وافيه بالحيل والفعل واستعدادها
     من الاصايل في القوايل نسمها ما يعيل
جريها في القايله كنها عقب ابرادها
     مركب ريف سد ومد وزود حيل
مثل المحاله على ميرادها
وهضعت تشدي لزرن الحنش لادنى المسيل
تنتهد بالجيري وتروج كن فخدادها
     مجرم علم بصوكه ولا سره عميل
لانتوت عقب الصلف كن صريف شدادها
     صوت قرن الظبي في كف نساجة جديل
تستخف من العتش والدعث ما كادها
     في السنود تزيد وتبدل المشي بهذيل
لا شعفها بالغنى ماقدر جوادها
لا غدى حبل الصريمه كما شرطان تيل
لا يعنيها سنة ما اختلف معتادها
     قو همتها والادلاج بالشد الثقيل
ما حلى في الفطر ولامه جوادها
صوب حج البيت يوم استطاع له سبيل
زايد الدنيا لنفس الفتيما زادها
وكثر خشع الله بقلب الفتى ماله مثيل
كلمتي ما احد نقصها ولا احد زادها
صابت المعنى ولاني على الناس بوكيل
القصيده بالثلاثين رغم اعدادها
ومن تعدى ما يرد الكريم الا البخيل

حي اهل عدً :

حي اهل عد(ن)جنوب(ن)على جاله عبل
طيب(ن)للبل وراعيه ما يقطع ظماه
ليت من يركب على الهجن وتخلا قبل
تحت نجم سهيل قدله على المسرى جراه
صاحبي في غيبتي ما لبس كود السمل
والجديد مهمل(ن)لين يدرس في طواه
ونتي ونة خلوج(ن)ولدها ما جدل
تبدي المشراف وترد منه للوطاه.

يا طير :

يا طير يا للي بالخضيراء وبيتك غار
وما جاز لك من راس برقاء رقيت بها
صبور على صلف الهبايب وتزيد طيار
وكل الجزيره في نهارك تدوج بها
تحيرت وانت مسامح ما عليك حيار
وامانتك مني رفقتك لا تمن بها
تودع سلام مسافر ماتجيه اخبار
وعينه من الغربه قريب حضايبها
وسلم على اللي عادته يكرم الخطار
وعينه من الغربه قريب حضايبها
وسلم على اللي ما يحسون ورع الجار
ورد الوصاه مسرعه لا تغيبها
وخبرهم اني ما سكنت الحفر مختار
ملكني بنو الخير وادري عواقبها
وترى القصور مالي منه شف ولالي كار
مبانيه لاعطى وزنها ما سكنت بها
يا قصر كنك لي عميل فانا بوار
بيني وبينك عملة الخير شح بها
ترى شف بالي مركب الحايل المشكار
الى روحت يطرب لها قلب راكبها
وقلبي يتوق لشوف ضو بغير وجار
الى روحت عرب الحنازيب تجذبها
ويا زين عقب التكلام صوت حوار
على اللي طفوح وراعي البل مزلبها
طفح شوفها وحوارها عذب النهار
مسير مع طرعات الاجهال يعجبها

الله من قلب تسوسه طواريه:

الله من قلب تسوسه طواريه
مثل الغريب بديرة الغرب سايس
يضحك مع ناس للاسرار تعطيه
ويحط له في كل وق رسايس
يضحك مع ناس للاسرار تعطيه
شوش علي وانا على النفس دايس
سدي على الانذال ما ودي ابديه
اللي مجالسهم يجيب الكلايس
ورزقي على اللي قضاء الامر بيديه
مظهر من البيداء نخيل غرايس
يا اللي دليل الهرج تفهم معانيه
حاذور من رفقة ردي الدعايس
حاذور من راعي النمامه تصافيه
من نم لك كثر عليك الحسايس
ورفيقك اللي يسمعك لا تخليه
.يقبل على دينه مصر مكايس
الهادي الله وانت خلك تمنيه
بالخير لا يلبس خبيث اللبايس
واللي يحب لك الردى لا تماليه
يكفيك راي مجنبين الطفايس
عليك باللي طيبات معانيه
يشفيك لا حسك من الهم حايس
قد جرب الدنيا تغيضه وترضيه
داري بحزات الرخاء والتعايس
من رافق الطيب دليله مقديه
مسراءه قمرا والدلايل بخايس
ومن رافق الخايب يظله ويغويه
عدة من اللي ياكلون الفطايس
شور الردي يقطع من الزرع ساقيه
ويضيع ما دله على الزرع رايس
من خاطب الجاهل طالت مشاحيه
ومجاوب الغيران وما ينتقايس

يا الله يا غافر خطيات الانسان:

يا الله يا غافر خطيات الانسان
يا اللي عقود الهم تطلق شركها
اعوذ بك يا الله من كل شيطان
دربه يدل الناس درب مهلكها
يا الله يا اللي كل يوم ولك شان
عني على نفس كثير حركها
واجعل لنا برضاك نور وبرهان
يرضيك الى عرضت جرايم انسكها
دنيا نبي منها ولا شوف غبطان
حطت بني ادم غنايم روكها
تدرس على الحين بكتاب موتان
وقت بهم سود الليالي حنكها
كم واحد سوى له الوقت بستان
وامسى بساتينه تطارخ بركها
واصبح بغب الزود يشرب بنقصان
يبغي من الدنيا وصاده شبكها
يا سهل فيها تمسك بالاحسان
الاسباب تحت الله ما احد تركها
لاحظ على دينك بتقويم الاركان
والنفس بحسن الخلق سمح سلكها
وعليك بالعلياء الى صرت بحلان
وما دار بالضيق يدور فلكها
واحرص على طيب النبا وانت كسبان
والنفس بحسن الخلق سمح سلكها
ترى المراجل ما تهيا لكسلان
سبحان مظهر حصنها من رمكها
ويا جاهل اوصيك لو كان زعلان
ضيقة رفيقك لا تواجه علكها
وترى الحمق عند المخاليص خذلان
راعيه تزلف هرجته ما ملكها
احلم عليه يشوف للرب علمان
ولا تبين له معابر سككها
ياخذ لها العارف محل ونيشان
منك وهو خذها عليك ومسكها
واحذر من هرجة على غير ميزان
وانا نذير من مخاطب عككها
خطوات مهبول على ساس خبلان
الى تعرض للسوالف عبكها